KORONADAL CITY- HINOLDAP na, tinangay pa ang motorsiklo ng isang lalaki sa bayan ng Tantangan, South Cotabato. Ayon sa biktimang si Zack Liway, minamaneho nito ang kanyang itim na Aerox na motorsiklo angkas ang dalawang kaibigan patungong Barangay Cabuling pasado alas-3:00 ng madaling araw ng Miyerkules.
Ngunit pagsapit sa Purok Paghidaet, Barangay New Iloilo ay bigla na lamang ang mga itong dinikitan ng ‘riding in tandem’ at tinutukan ng baril.
Kinuha ng mga suspek ang kanilang bag, cellphone, pera at tinangay pa ang kanyang motorsiklo na may plate number 121 MPV.
Agad namang tumakas ang mga suspek palabas ng national highway. Nagsasagawa na ng masusing imbestigasyon ang Tantangan PNP kaugnay sa naturang insidente upang matukoy at mahuli ang mga suspek.
