Motorista, gadan kan aksidenteng mabangga an nakaparadang awto sa Tabaco City

LEGAZPI CITY – Gadan an sarong motorista makalihis kaining aksidenteng mabangga an sarong nakaparadang awto sa Purok 2, Brgy. Bangkilingan, syudad nin Tabaco sa probinsya kan Albay.

An biktima, sarong 45 anyos na lalaki, may agom asin residente kan Zone 3 kan kaparehong barangay.

Nagluluwas sa imbestigasyon kan Tabaco Municipal Police Station na hale sa Brgy. Panal an motorsiklong Honda TMX na minamanehar kan biktima pasisiring sa Brgy. Matagbac.

Mantang pigbabaybay an kahalabaan kan National Road kan nasambit na barangay, aksidente kaining nabangga asin natamaan an sarong Toyota Altis na nakaparada sa gilid kan tinampo.

Huli kaini, naulog an motorista asin nagsapar ki seryosong tama.

Tulos man nagresponder an CDRRMO asin naidalagan sa Ziga Memorial District Hospital para sa atensyon-medikal alagad dineklarar ining dead on arrival kan attending physician.

Naimpormaran naman an pamilya kan biktima asin dinara sa hepatura kan pulisya an behikulong imbwelto magin an iba pang mga kagamitan para sa magkakanigong disposisyon.

Leave a Reply

Your email address will not be published. Required fields are marked *