Arestado ang isa ka 46-anyos nga mister matapos gin-implementaran sang search warrant sang mga kapulisan sa iya puloy-an sa Brgy. Punta Tabuc, Roxas City takna 6:04 kagab-i sang Huwebes, Hulyo 27.
Ginkilala ang naaresto kay Michael Delos Reyes Bergantinos, residente sang nasambit nga lugar.
Narekober sa paghinakop ni Bergantinos ang isa ka .357 caliber revolver, isa ka break type single shot homemade nga armas luthang, kag mga bala.
Ang search warrant ang gin-isyu ni Judge Esperanza E. Poco-Deslate.
Magapangatubang sang kaso nga paglapas sa RA 10591 ukon Comprehensive Firearms and Ammunition Regulation Act si Bergantinos.
Nahibaluan nga madugay na nga ginareklamo sang pila ka mga residente si Bergantinos nga masami nagapinalupok sang armas-luthang.
Sa karon, yara na ini sa kustodiya sang Roxas City PNP para sa nagakaigo nga disposisyon. | Judy Ann Juare
