Makuti nga imbestigasyon ang gilusad karon sa mga imbestigador sa Hagonoy Municipal Police Station sa pagkamatay sa usa ka misis nga nabulit og samad tinigbasan ang lawas sa Purok 16, Poblacion, Hagonoy, Davao de Sur.
Una niini, gihulat pa sa bana nga si Dennis Ondoy ang iyang asawa nga si Jovy Ondoy aron mag-harvest og saging nga paliton sa ilang buyer nga gikan dinhi sa Davao City.
Gumikan wala kini naabot, miuna na lamang ang bana og buyer sa sagingan ug didto nakit-an sa buyer ang usa ka babaye nga nagbuy-od nga dunay mga samad tinigbasan sa lawas.
Subay sa report sa Hagonoy PNP, ayha pa ang pag-adto sa buyer sa balay sa magtiayon, gikontak pa sa biktima ang buyer bandang alas 9:00 sa buntag aron ipahibalo nga ipakuha na ang saging.
Giadtuan kini sa wala panganling buyer og naabtan ang bana nga nagpahulay sa duyan samtang gipaabot nila ang biktima nga muuli sa pagtuo nga nipalit lamang kini og sud-an.
Gisubay na sa otoridad ang mga posibleng sirkumstansiya nga makahatag og lead sa pag-ila sa suspek nga mitigbas patay sa biktima aron masilotan.BNFM-DAVAO
