NAILHAN na sa kapulisan ang duha katao nga mipusil-patay sa usa ka ‘rookie’ nga pulis samtang nagkaon sa restawrant alas-10:25 sa gabii, Huwebes.
Kini human makuha sa kapulisan ang kopya sa CCTV sa restawrant sa Barangay Fatima asa nahitabo ang pagpatay.
Matud ni Police Col. Jomar Alexis Yap, director sa GenSan City Police Office (GSCPO) nakita sa CCTV ang nawong sa ‘gun man’. Samtang kini ang nagpakuno nga mo-order og pagkaon og kaestorya ang tinder sa kan-anan.
Wala na gihatag ni Yap ang pangalan sa duha katao dungan sa padayong paggukod nila sa mga nahisgotan. Dili pa usab masulti ni Yap ang motibo sa krimen, asa personal nga bangi ug kalabutan sa trabaho ang gisundan nga motibo sa krimen.
Una nang, gikondena ni Police Brig. Gen. Jimili Macaraeg, director sa Police Regional Office (PRO) 12 ang pagpatay kang Police Corp. Razul Alongan nga nadestino sa Tambler Police Station. Si Alongan ang ikaduhang intelligence officer sa PRO-12 nga gipusil-patay karong bulana. I Richel Gubalani
