Hingpit ng gipahunong sa Mines and Geosciences Bureau ang operasyon sa Riverbend Consolidated Mining Corporation/Arc Nickle Resources Inc. nga maoy gitudlong responsable sa water discoloration/siltation sa Mapagba River sa Barangay Maputi sa Banay Banay sa probinsiya sa Davao Oriental.
Kagahapong adlawa, gipatawag gilayon ni Governor Nelson Dayanghirang ang MGB aron mando-ang ipahunong ang operasyon pinaagi sa kumpirmasyon ni Undersecretary Atty. Wilfredo Moncano.
Alayon niini, mimando na sab ang MGB Central Office sailang regional office nga ihunong na ang ilang operasyon aron hatagan og higayon ang mga otoridad nga makabuhat og dugang imbestigasyon ug unsa ang lakang nga angay buhaton aron masulosyonan ang maong suliran.
Gipunto ni Gov. Dayanghirang nga dili niini ikumprimiso ang seguridad ug kaluwasan sa mga residenteng naapektuhan bisan paman nga ang mining companies nagahatag og dugang income ug makatabang sa pagrekober sa ekonomiya apan barugan matud pa nila ang ilang desisyon nga dili na tugutan ang mining companies nga mag operate nga mao sab ang naguba sa kinaiyahan.
Gipaniguro sab ni Gov. Dayanghirang nga dili usa makabalik sa operasyon ang MGB kung dili pa mahatagan og solusyon ang maong suliran diin mamahimo sab nga mag atubang og silot.
Kahinumdoman nga nakugang ang mga residente sa maong lugar dihang nausab ang kolor sa tubig sa sapa nga gikabalak-ang dunay dili maayong epekto sa ilang panglawas ug miresulta sa fish kill. BNFM-Davao
