Gimando ni Davao City Mayor Inday Sara Duterte sa City Prevention and Enforcement Cluster nga luagan ang pagpatuman sa mga guidelines ubos sa Alert level 3.
Tugutan sa Mayor ang ubang mga establisyemento nga mangabli nga wala tuguti ilawum sa Alert Level 3 sama sa mga karaoke bars, resto bars, bisan ang entertainment.
Dungan niini, kinahanglan siguruhon sa maong mga establisysmento nga masunod ang minimum public health standards sama sa pagsoot sa face mask ug physical distancing sa mga customer lakip usab ang modified guidelines sa liquor ban.
Gihatagan og punto sa opisyal nga dili makaayo sa ekonomiya ug mga gagmayng trabahante ang pag-abli-sirado sa mga negosyo.
Boot usab ni Mayor Inday nga itugyan niini sa matag Dabawenyo ang responsibilidad nga mag-amping ug mahimong disiplinado aron malikay matakdan sa sakit.
Himoon matud pang rason sa lokal nga panggamhanan ang “liberal enforcement” sa Alert level 3 guidelines sa higayon nga sitahon sa IATF ang City LGU.
Sa pikas bahin, gitataw ni Davao City Mayor Sara Duterte nga walay partisipasyon ang syudad sa “No Vaccine No Movement sa Department of Transportation.
Kahibaluan nga una nang gipatuman sa DOTr didto sa National Capital Region ang No Vaxx No Ride policy sa pampublikong transportasyon kagahapon. BNFM-Davao
