Tiniyak ng Philippine National Police na hindi malalabag ang ‘privacy’ ng mga kapulisan kaugnay sa bagong kautusan ni PNP chief Dionardo Carlos na magsagawa ng inspection sa mga cellphone ng mga miyembro nito.
Layon ng inspeksiyon na matiyak na walang pulis ang nahuhumaling sa pagtaya sa online sabong.
Ayon kay PNP spokesman PCol. Jean Fajardo ang kautusan ni Carlos ay base lamang sa mandato at authority nito bilang hepe ng pambansang pulisya.
Sa ngayon binabalangkas pa umano ang official memorandum kaugnay dito.
Maliban sa cellphone sinabi ni Fajardo na magkakaroon din ng random inspection sa mga office computers at laptops para matiyak na walang mga naka-install na e-sabong apps.
Samantala inilahad naman ni Fajardo na aabot na sa 7 pulis ang nasampahan nila ng kaso dahil sa pagkakasangkot sa online sabong.
