BICOL – IPIGLANSAR kan Department of Public Works and Highways an programa na mataong tabang sa mga nawaran trabaho dahil sa COVID-19 pandemic.
Kasudma,ipiglansar kan ahensya an bagong programa kaini na Assistance to Youth and Unemployed for Development and Advancement o AYUDA Program.
Segun sa DPWH-Bicol, ipapautob an AYUDA Program sa dyes y sais nindang mga Regional Offices asin siento otsenta y nuebeng mga District Engineering Offices sa bilog na nacion.
Ipinahayag man ni DPWH Secretary Roger Mercado, obheto kan bagong inisyatibo kan saindang departamento na makatabang tanganing simbagan an naglalangkaw na unemployment rate sa nacion dara kan pandemya.
Dawa na ngani niluwagan na kan gobyerno an mga restrictions asin padikit dikit nang nakakapag balik operasyon an nagkapirang mga negosyo, dai pa natatapos an pandemya asin dakul pa an mayong hanapbuhay o pinagkakakitaan.
Mantang kabale sa mga trabahong itatao sa mga benepisyaryo kan AYUDA program iyo an paglilinig sa kalye , paglilinig kan street signs, paghahakot nin waste materials, asin pagpintura sa mga concrete barriers.
Maresibe man nin sertipiko an mga benepisyaryo na saindang magagamit sa saindang future employment.
An DPWH AYUDA an nabilog base sa dating mga employment programs kan ahensya siring kan Kalsada Natin Alagaan Natin (KNAN) asin Out-of-School Youth toward Economic Recovery o OYSTER program.
