Libre na nga makapa-screen ang mga pumuluyo sa Capiz agud ila mahibaluan kun nagasupreher sila sang balatian sa kidney kag diabetes bangud may yara na sang Urine Albumin-Creatinine Ratio (UACR) Machines ang apat ka District Hospital sa probinsya.
Suno kay Provincial Health Officer II Dr. Alex Nolasco, ang nasambit nga machine ang nagikan sa AstraZeneca pinaagi sa Addressing Complications Today through Network of Warriors (ACT NOW) nga nagabalor sang 4 tubtob 5 milyon pesos sa pagtinguha man sang provincial government nga makaagom. Ang amo nga makinarya, sarang maka-detekta sang balatian sa bato bilang pamaagi man agud maprebentar ang Chronic Kidney Disease (CKD) kag iban pa nga komplikasyon.
Magahiwat sang libre nga screening ang mga masunod nga ospital:
Roxas Memorial Provincial Hospital – Lunes asta Byernes
Bailan District Hospital: Martes, Myerkules kag Byernes
Dao District Hospital: Lunes asta Byernes
Mambusao District Hospital: Lunes kag Martes. | Judy Ann Juare
