Ginpasalamatan ni Punong Barangay Erwin Oroceo ang ginpatuman nga City Ordinance No. 045-2022 “Baybayon ko, Limpyohan ko” bangud naghagan-hagan na ang mga basura nga nagalapta sa higad sang Baybayon sa syudad sang Roxas.
Sa interview sang Brigada News FM Roxas City kay Kapitan Oroceo, iya ginpahayag nga pabor gid siya sa mga ginapatuman nga ordinansa sa syudad bangud nakita na niya ang maayo nga resulta.
Suno kay Oroceo, nagasunod man sa patakaran ang mga owner sang restaurant kag wala na sila nagalapta sang mga basura.
Dugang pa sini, madamo naman sa ila barangay ang nadakpan nga nagapanigarilyo kun sa diin nagakaapektuhan man sila nga mga barangay opisyal bangud sila ang nadalaganan sang mga pumuluyo nga nagapangayo sang bulig sa tion nga mamultahan.
Nagpanugyan man ini sa iya mga nasakupan nga likawan na ang paglapas sa mga ginapatuman nga ordinansa agud indi na makabayad sang penalidad.
