Gin-pueong it lokal nga gobyerno ro mga tag ana it bar ag restaurants iya sa banwa it Kalibo.
Ro nasambit nga pueong hay may tinutuyo nga mapunggan ro pagtaas it kaso it covid-19 sa Kalibo, mapunggan ro aksidente sa daean ag mapunggan ro kremin.
Base sa ginapatuman nga mga ordinansa sa Kalibo, ginkasugtanan nga ro mga bar hay pwede eamang mag serve it order hasta 11:30 it gabii ag magasara it ala una it kaaganhun.
Pwede man nga mag operate ro mga bar it alas 5 it hapon hasta ala una it kaaganhun it rayang Agosto eamang ag pagkatapos hay uman nga iga-evaluate.
Sa parte man it mga restaurants, pwedeng mag operate it alas 8 it agahun hasta alas 12 it tungang gabii.
Indi pwedeng baligyaan ro mga menor de edad it aeak ag indi man pwedeng pasudlon sa mga bar, kinhangean man nga may sekyu ro mga bar para mapabilin ro peace and order.
Dapat man nga sundon it mga menor de edad ro ginapatuman nga curfew nga 10PM hasta 4AM.
Ro mga pulis hay regular nga maga inspeksyon sa mga bar sa Kalibo.
Ro Executive Order it LGU Kalibo hay magiging epektibo umpisa makarung adlaw August 10, 2022. / ANN DESLENE SALAZAR
