LEGAZPI CITY – Uminabot na sa 7,689 an bilang kan mga apektadong estudyante na nasa laog kan 6 – 7 kilometer extended danger zone kan Bulkan Mayon.
An datos na ini, pigkumpirmar mismo kan Department of Education (DepEd) Schools Division Office of Albay DRRM Coordinator na si Alvin Cuz.
Segun kay Cruz, padagos an pigsasagibong monitoring kan saindang opisina sa mga estudyanteng presenteng nagtitiner sa mga evacuation centers sa manlain-lain munisipyo para masubaybayan an mga ini asin dai maapektaran an pag-adal kan mga ini sa sitwasyon ngunyan sa probinsya kan Albay.
Kaibahan man sa mga pigmomonitor kan Deped an mga classroom na presenteng pigagamit kan mga evacuees kan Bulkang Mayon.
8 sa mga eskwelahan na ini an mahigot na pigbabantayan kan Deped kun sain nagtatao man nin technical assistance sa mga ini.
An 8 eskwelahan iyo an Gabawan, Budiao, asin Anislag Elementary School sa Daraga, Comun, Taladong, asin Bariw Elementary/National High School sa Camalig, asin Mauraro National High School man sa Guinobatan.
Tinawan duon man ni Cuz na piggigibo naman kan Deped Albay an saindang parte para masigurong padagos man gilayon an pag-adal kan mga nasambitan nang mga estudyante lalo na an pagtukdo kan mga paratukdo sa mga apektadong eskwelahan.
