GINA-ANUNSYO sa taga Metro Gensan Transport Cooperative nga aduna na usab sila libreng wifi alang sa ilang mga sumasakay mao nga ilang ginapanawagan ang mga sumasakay sa ilang rota nga mosakay sa electric jeepney.
Sa pahayag ni Rommel Polo, usa ka miyembro sa Metro Gensan Transport Cooperative ginapahibalo niini nga susama sa Ladotransco nga aduna nay wifi sila usab nag-comply na sa usa ka rekositos sa modern transportation.
Gidugang ni Polo nga nagapangayo sila og suporta gikan sa mga sumasakay pinaagi sa pagtangkilik sa e-jeep nga nagabyahe gikan sa Barangay Mabuhay, Barangay San Isidro, Lagao padulong sa downtown area.
Aduna na usab sila bag-ong terminal sa VSM San Isidro nga girentahan aron nga masunod ang oras sa interval aron masiguro nga anaa kanunay nagadagan nga e-jeep sa North Loop.
Gidugang ni Polo nga wala pa sila naka- impas sa ilang utang sa bangko sa mga e-jeep nga gadagan mao nga nagahangyo sila sa taga Gensan nga mosakay sa ilang ejeep nga nagapamasahero. ( Ver Diazon)
