ANDAM muhatag og pabuya ang mayor sa munisipyo sa Polomolok nga si Mayor Bernie “Jojo” Palencia alang sa mga makatudlo sa nagpaluyo sa pagpatay sa duha ka mga sakop sa Civil Security Unit (CSU) niaging adlawng Biyernes Enero 6.
Gibutyag ni Palencia nga muhatag siya og P300,000 pesos sa kinsa mang nakaila o may kasayuran ug makatudlo sa mga suspek sa brutal nga pagpatay nilang Jessi Arciete alyas Loloy ug Bonifacio Cabisada alyas Bonie alang sa paspas nga pagresolba ug pagpasaka og kaso batok sa mga suspek.
Nasayrang dugay nang gaserbisyo kaniya ang mga biktima sugod pa kaniadtong gapangampanya palamang kini hangtud nga nahimong mayor sa munisipyo.
Duol matud pa sa kasing kasing ni Palencia ang mga biktima hinungdan nga muhatag usab kini og tabang pinansyal sa pamilya sa duha ka biktima. Makig-alayon lamang matud pa sa kapulisan aron makahatag og dugang impormasyon ug aron nga mahatagan ug hustisya ang mga biktima.
Samtang gikondena sa mga higala ug mga kauban sa trabaho nilang Loloy ug Bonie ang ilang nadangatan rason nga apil usab silang gasinggit ug hustisya.
Kahinumdumang gipusil ang mga biktima sa dihang sakay sa ilang tagsa-tagsa ka mga motorsiklo samtang pauli na gikan sa Barangay Sulit Polomolok. Pulos nakaangkon og samad pinusilan sa ulo silang Loloy ug Bonie nga maoy hinungdan sa ilang hinanaling kamatayon. I MJ Fernandez
