GIKLARO ni Mayor Ronnel Rivera nga dugay na ang mga dagkong proyekto nga ipatuman sa syudad apan natanggong lang tungod sa COVID-19 pandemic.
Usa dinhi ang binilyon ka pesos nga bag-ong city public market asa giklaro sa mayor nga dili lang karon nila kini giplano apan niadtong unang termino pa apan tungod taas ang panahon nga kinahanglan sa pagplano, naabtan og pandemya nga mas angayang unahon sa pag-atiman.
Lakip sa mga proyekto nga natanggong nga angayang maimplementa ang sanitary landfill nga puno na usab ug mga heavy equipments alang sa mga barangay sa paghakot nila og basura.
Ang plano matud pa sa pagtukod og bag-ong palengke mao ang pagpalit una og luna ug anaa silang ginatrabaho nga nahimutang sa Barangay Labangal, o kaha ang kasamtangang city public market nga himuong state of the art nga palengke nga mahimong tawgon nga mall palengke.
Sa karon, may pagduso og credit line sa Land Bank alang sa P1.9 billion nga mahimong utangon sa syudad, alang sa mga major projects apil dinhi ang binilyon ka pesos nga pagtukod og bag-ong palengke.
Matud sa mayor, dili man karon mapatuman ang maong mga proyekto, mahimo usab kining mapadayun sa umaabot nga administrasyon tungod alang usab kini sa kaayohan sa katawhan sa GenSan.
