Nakahunong kadya sa karsel kang San Jose Municipal Police Station ang ginakabig street level individual nga ginkilala kay Alyas Nicole, 26 anyos, wara kang obra, kag residente kang Brgy. Mansilingan, Bacolod City, apang temporaryo nga nagapuyo sa Brgy. Funda-Dalipe, San Jose matapos madakpan sa ginpatigayon nga drug buy bust operation, la-1:12 sa kaagahun, kang Agosto 31.
Sa ginpatigayon nga operasyon nga ginpangunahan kang San Jose Municipal Police Station-Special Drug Enforcement Team sa pagpamuno ni PMaj. Geremy Ian Magbanua, Antique Police Provincial Office – Provincial Drug Enforcement Unit, kag Antique PPO Provincial Intelligence Unit, natigayon nga maaresto ang persona sa diin nabuol kana ang ginabanta 3 ka gramo kang ginapatihan shabu nga may standard drug price kang P20,400 kag may balor P6,500 kada gramo.
Samtang, ang nasambitan nga balor ang ginalakipan kang sangka heat-sealed transparent plastic sachet kang shabu nga amo ang buy-bust item, dugang nga tatlo ka pakete kang shabu nga nabuol naman kang dya ang ginkapkapan, P1,500 nga buy-bust money, kag mga non-drug items.
Na man-an nga tatlo ka bulan nga nagabusong sa anang ikatlo nga bata si Alyas Nicole samtang ang anang live-in partner naman nga ginkilala kay alyas Bernard ang naaresto man kang mga operatiba kang probinsya kang Antique kang tinalikdan nga Mayo kadya nga tuig sa Iloilo City.
Magapangatubang naman ang persona sa kaso nga paglapas sa layi tuhoy sa iligal nga droga.
