Pwersahan nga sinueod ro eskuylahan it Cabangila sa banwa it Altavas kabii ngani nagtuga raya it perwisyo ag kasamaran sa eskuylahan.
Base sa facebook post it Cabangila Elementary School, siyam tanan ka kwarto ro ginsamad ro mga kandado, doorknob ag door grills ag natigayon nga mabuksan, kaeakip ro opisina, e-room ag canteen.
Ro mga steel cabinet hay natigayon man nga mabuksan ag nabuoe ro sambilog nga laptop sa e-room pero raya hay gin aywanan man sa Eahog Elementary School, sambilog nga eskuylahan nga gntakawan man kabii.
Mabahoe gid nga perwisyo ro anda nga ginhimo ngani gapangayo it bulig ro nasambit nga eskwelahan kung sin o ro may nasayran sa insidente okun basi may mga maeapit nga CCTV sa mga daeanon halin sa Cabangila paagto it Catmon.
Nasayuran nga may pilang beses eon segun raya nga ginaubra sa Cabangila Elementary School it owa pa matumod nga mga tawo. // ANN DESLENE SALAZAR
