Nagpaguwa it anunsyo ro System Operator, NGCP, sa andang Facebook page nga sanda hay nagpatuman it Manual Load Dropping sa mga apektadong electric cooperatives sa Panay kahapon bangud sa unplanned outage it PEDC Unit 3.
Base sa NGCP, base sa mandu it DOE ag ERC, posibleng ipatuman it uman ro MLD kung may matabo nga dugang nga tripping it mga maeagko nga planta sa Panay.
Ro insidente hay kinumpirma sa sueat it Panay Energy Development Corporation (PEDC) na nabatun it AKELCO ku January 18,2024, nga ro andang 150MW Unit 3 coal power plant sa Lapaz, Iloilo hay naka-shutdown o offline halin it January 17, 2024, sa 6:44 it gabii hasta makarun.
Ginpaabot it PEDC nga bangud sa unplanned outage it andang Unit 3 power plant, gin-reschedule eon lang nanda ro Emergency maintenance Shutdown it PEDC Unit 2 sa pilang adlaw.
Ro Panay Energy Development Corporation hay sa mabahoe nga planta sa Panay nga naga-supply sa mga electric cooperatives sa isla kaeakip eon ro AKELCO.
Bangud kara, gin abisuhan it AKELCO ro mga konsumidor nga magpahaum sa posibleng matabo nga Manual Load Dropping ag rotational black out. // ANN DESLENE SALAZAR
