Uman nga ginpadumdom ni Kalibo Vice Mayor Cynthia Dela Cruz ro ordinansa kaangot sa No Smoking and Vaping ag Anti-Littering makarung selebrasyon it Ati-Atihan Festival 2024.
Mabuhay eon segun raya nga ordinansa nga ginapatuman eabi eon sa Ati-Atihan sa Kalibo, pero uman nana nga ginpadumdom para sa mga bisita ag turista nga owa pa kasayud sa nasambit nga ordinansa.
Bawae ro pagpanigarilyo ag pag vape sa mga karsada ag plaza o iba pang pampublikong lugar sa Kalibo.
Owa man segun it benepisyo sa kaeawasan ro pagpanigarilyo ngani mas mayad kung punduhon eon ro nasambit nga bisyo.
Kaangot man sa Anti Littering ordinance nga indi magpilak it basura eabi eon makarun nga Ati-Atihan, hugot nga ginapatuman raya makarun nga dag on.
Naobserbahan ni Vice Mayor Dela Cruz nga kada Ati-Atihan hay maabu ro nagkalat nga basura ngani umapela raya sa tanan nga indi basta maghaboy o magkalat it basura bisan siin, mas mayad nga ibutang raya sa tamang lugar. // ANN DESLENE SALAZAR
