Pilas sa dughan ang naangkon sang isa ka mamumugon matapos ginluthang sang kasubong man mamumugon sa Sitio Maludlod, Brgy. Duran, Dumalag, Capiz takna alas 9:40 kagab-i sang Lunes, Nobyembre 27.
Ginkilala ang biktima kay alyas Jason, 30-anyos samtang ang suspek amo si alyas Joel, 40-anyos lunsay residente sang nasambit nga lugar.
Sandig sa impormasyon nga nakuha sang Brigada News FM Roxas City sa Dumalag Municipal Police Station, ginapahayag nga may yara sang indi pag-intindihanay ang suspek kag ang asawa sini, kun sa diin hinali lang nga nag-abot ang biktima kag tuyo kuntani nga magtambag bangud nakita sini nga may hawid nga armas-luthang ang suspek.
Bangud sa natabo, gin-luthang sang suspek ang biktima sa dughan.
Gilayon nga ginpadangat sang Rescue Patrol ang biktima sa Tapaz District Hospital apang sang ulihi gintransfer ini sa Western Visayas Hospital sa syudad sang Iloilo.
Boluntaryo naman nga nagsungka ang suspek sa isa ka Barangay Kagawad kag ginturn-over sa mga nagresponde nga kapulisan sa lugar.
Sa karon, nagapabilin ini sa kustodiya sang Dumalag PNP para sa nagakaigo nga disposisyon. | Judy Ann Juare
