Nag-angkon sang pilas sa dughan kag kamot ang manghud matapos ginbuno sang magulang sa Brgy. Santo Angel, Dumalag, Capiz takna alas 5:15 kahapon sang Lunes, Nobyembre 27.
Ginkilala ang biktima kay alyas Reymond, 31-anyos, isa ka market vendor samtang ang magulang nga ginatudlo suspek amo si alyas Jose, 41-anyos, fish vendor kag lunsay residente sang nasambit nga lugar.
Sandig sa impormasyon nga nakuha sang Brigada News FM Roxas City sa Dumalag Municipal Police Station, yara sa impluwensya sang makahulubog nga ilimnon ang mag-utod kun sa diin ginkompronta sang manghud ang iya magulang may kaangtanan sa ginpadalawat nga palay nga ginapanag-iyahan sang ila ginikanan.
Nag-angkon sang indi pag-intindihanay ang duha tubtob nga ginsumbag sang manghud ang iya magulang sa ulo kag nabuklan.
Ginapahayag nga nagkuha sang kutsilyo ang magulang kag ginbuno sang maka-apat ka beses sa dughan kag kamot ang iya manghud.
Gilayon naman nga nagresponde sa lugar ang Dumalag Emergency Response Team kag ginpadangat sa Dao District Hospital ang biktima para sa nagakaigo nga pagbulong.
Sa karon, nakahunong na sa karsel sang Dumalag PNP ang suspek para sa nagakaigo nga disposisyon. | Judy Ann Juare
