Dead on arrival sa ospital ang isa ka mamumugon matapos gin-ayad bunal sang kasubong man mamumugon sa Barangay Taft, Tapaz, Capiz.
Ginkilala ang biktima kay Mesio, 51-anyos samtang ang ginatudlo suspek amo si alyas Onyok, 54-anyos lunsay mga residente sang nasambit nga lugar.
Sandig sa impormasyon nagikan sa Tapaz Municipal Police Station, samtang yara ang suspek sa sulod sang rice warehouse nga ila ginatrabahuan, hinali lang nag-abot ang biktima nga yara sa impluwensya sang makahulubog nga ilimnon.
Ginapahayag nga ginpalapitan sang biktima ang suspek kag nag-angkon ang mga ini sang mainit nga pagbinaisay, kun sa diin una nga ginlampusan sang biktima ang suspek gamit ang isa ka ginupod ukon kahoy kag naigo ini sa kilay.
Bangud sini, gin-agaw sang suspek ang kahoy kag gin-ayad bunal ang biktima sa nagkalain-lain nga parte sang lawas.
Gilayon naman nga ginpadangat sang mga kapulisan nga nagresponde sa lugar ang biktima sa ospital apang ini ang wala na matabangan pa.
Sa karon, yara na sa kustodiya sang Tapaz PNP ang suspek matapos nadakpan sang mga otoridad kag ginahulat nalang kun magapasaka sang kaso ang pamilya sang biktima. | Judy Ann Juare
