Mipasidaan ang Land Transportation Office-Northern Mindanao batok sa makalapas sa gitakda nga bag-ong maxium prescribed rates alang sa mga driving school.
Sumala ni LTO-Northern Mindanao Regional Director Nelson Manaloto nga mahimong ubsan sa mga tigdumala sa driving school ang ilang rate, apan dili mahimong labwan tungod mas bug-at nga penalidad ang ilang atubangon nga muabot sa 100,000 pesos.
Sa bag-ong maximum prescribed rates sa driving schools nga ipatuman sa tunga-tunga nga bahin sa Abril ning tuiga, 1,000 pesos sa theoretical driving course, P2,500 sa practical driving course alang sa motorcycle/tricycles; P4,000 sa practical driving course (cars and light trucks) ug P8,000 practical driving course (truck, passenger vehicles).
Dugang ni Director Manaloto nga aron makadaginot, mahimo nga mo-avail ang mga bag-ong magpa-rehistro sa gitanyag nga libreng theoretical driving course sa LTO.
Samtang sa bahin ni PERS Driving School Manager Lito Rulona, gikalipay nila nga duna nay gitakda nga prescribed rates ang LTO ug lantaw nila nga igo lamang kini tali sa estudyante ug kanila nga gadumala sa driving school.
Kahibaloan nga ang bag-ong guidelines mi-agi sa hugot nga pagtuon sa Technical Working Group ug consultations sa tanang stakeholders. -END-
