Gihikay na ang kasong murder batok sa suspek nga midunggab-patay sa empleyado saLand Transportation Office (LTO) 11, pasado alas-2:00 sa kadlawon kagahapon, Disyembre 19, 2023.
Gilantaw nga motibo karon sa San Pedro Police Station, mao ang love triangle sa kamatayon sa biktima nga nailang si Gordon Gildo Gabrinez, 34 nga residente sa No. 90 Rizal Ext., Brgy.38-D, ning syudad.
Samtang ang suspek nailang si Ravin Mulat Cedeńo, BPO encoder.
Ayha paman nahitabo ang krimen, nadiskobrehan sa kaipon sa biktima nga duna kini laing babaye nga mao ang asawa sa suspek.
Ug aron nga maklaro ug mahusay, nagtagbo ang biktima kauban ang iyang kaipon, ang suspek uban sa asawa niini nga mao ang gikaingong ka-love affair sa biktima.
Samtang nagka-istorayahanay ang upat atbang sa panimalay sa biktima, kalit na lamang nga gidunggab sa suspek si Gabrinez gamit ang kitchen knife (nga anaa sa 12 inches ang gitas-on) nga maoy hinungdan sa kamatayon niini.
Kasamtangan, anaa na sa kustodiya sa San Pedro PNP ang suspek human nga misurender sa gihimong krimen.
