Lolo, pilason matapos ginlabo sang iya apo

Nagapabilin sa Roxas Memorial Provincial Hospital ang isa ka lolo matapos ginlabo sang iya apo sa Sitio Proper, Brgy. Capagao, Panitan, Capiz sang tinalikdan nga Sabado, Hunyo 22.

Ginkilala ang biktima kay Cornelio Catalan, 71-anyos, samtang ang ginatudlo suspek amo si Ryan Catalan, 31-anyos, mamumugon, kasado kag lunsay mga residente sang nasambit nga lugar.

Sandig sa imbestigasyon sang Panitan Municipal Police Station, nagainom-inom sang makahulubog nga ilimnon ang biktima kag suspek sa balay sini, sang hinali lang nagluntad ang pagbinaisay, kun sa diin ginsumbag sang biktima ang suspek sa nawong, rason nga madasig naman nagkuha sang binangon ang suspek kag ginlabo ang biktima sa ulo.

Sa karon, ginhilway na sa karsel sang Panitan MPS ang suspek matapos nagtakop ang reglementary period sini. Ginahulat naman sang mga pulis ang desisyon sang pamilya kun magapasaka sang kaso batok sa suspek. | Judy Ann Juare

Leave a Reply

Your email address will not be published. Required fields are marked *