Nagpatigayon sang oplan sagip bata ang lokal nga gobyerno sang syudad sa pagpanguna ni Mayor Ronnie Dadivas kaupod ang Department of Social Welfare and Development (DSWD) Capiz kag Roxas City PNP matapos mabaton ang madamo nga reklamo nahanungod sa mga kabataan nga nagapangilimos sa bahin sang Baybay.
Nagpaandam ang alkalde sa mga ginikanan nga posible sila magapangatubang sang nagkalain-lain nga sanction kun mapamatud-an nga ginapabay-an nila ang ila mga kabataan.
Una dire, kun isa ka benepesyaryo sang 4Ps ang ginikanan kag mapamatud-an nga ginapabay-an nila ang ila kabataan nga magpangilimos, pagakakason ini sa listahan sang 4PS kag indi na makabaton sang ayuda.
Ikaduwa, kun madakpan ang kabataan kag mahibaluan nga benepisyaryo sang bugas para sa taga-Roxas ang ginikanan, pagakakason man ini sa listahan.
Ikatatlo, igapaidalom sa seminar ang mga ginikanan nga nagapabaya sa ila mga kabataan kag kun indi magpasugot indi ini makabaton sang anuman nga benepisyo gikan sa gobyerno.
Nahibaluan nga ang mga kabataan nga madakpan nga nagapangilimos ang ginapasakay sa patrol kag ginadala sa talatapan sang DSWD agud ipagawad sa mga ginikanan ukon guardian. | Judy Ann Juare
