GILAUMAN nga ikonsidera sa local IATF ang hangyo nga wagtangon ang liquor ban nga gipatuman sa GenSan.
Kini ang gipanghinaut ni Kagawad Jose Edmar Yumang samtang wala pa masayran ang desisyon sa local IATF sa duha ka resolusyon nga giaprobahan sa konseho, nga pagwagtang sa liquor ban ug gipamub-an nga curfew hours.
Rason ni Yumang nga wala man nalatid sa patakaran sa national IATF ang liquor ban apan ang pag-regulate lang niini dungan sa pagsunod sa health protocols aron dili usab maka-contribute sa pagkatag sa COVID-19.
Giangkon ni Yumang nga may discretion ang LGU sa pagpatuman sa unsa mang patakaran aron mapugngan ang pagkatag sa virus apan angayan usab dili mawad-an og panginabuhian ang mga retail store ug mall nga gabaligya og ilimnong makahubog. Gawas sa pagwagtang sa liquor ban, gihangyo usab ni Yumang sa local IATF nga pamub-an ang curfew hour gikan sa alas 10 sa gabii hangtud alas kwatro sa kaadlawon ngadto na sa alas 11 sa gabii hangtud alas 4 sa kaadlawon.
Photo: LGU-Gensan
