WALA naka-ikyas sa matawag nga diskriminasyon sa mga tao ang pamilya ni Julius, usa sa survivor sa COVID-19 sa Sarangani Province human natakdan ang ilang pamilya. Si Julius, 40- anyos, residente sa usa sa munisipyo sa Sarangani, ang asymptomatic survivor, natakbuyan kini sa makalilisang nga virus apan walay sintomas.
Apan ang iyang ugangan, usa ka senior citizen, ang wala kakaya sa kabangis sa virus ug nakutluan intawon sa hinulamang kinabuhi. Segun ni Julius, taliwala sa diskriminasyon, kinahanglan matud pa sila nga magpadayon sa pagkinabuhi ug dili magpalabi sa pagkasubo alang sa nahabilin nilang kapamilya.
Dili tiaw matud pa nga masulod sa quarantine facility tungod nag-inusara lang kini sa kwarto bisan pa nga libre ang konsumo. Kinse (15) ka adlaw kini sulod sa municipal isolation center, pito (7) ka adlaw pud nga nag-home quarantine paggawas sa quarantine facility. Wala kini laing gibuhat sa panahon sa iyang kwarentina kundili ang pagsangpit lang gyud sa Ginoo ug ang padayon nga komunikasyon sa pamilya gamit ang cellphone aron madasig sa pagpabaskog. Tambag niini sa katawhan, pirme matud pa magpalaski aron himsog sa kanunay, ug padayong tumanon ang mga patakaran nga gipa-implementa hilabi na matud pa sa LGU Sarangani sa pamunuan ni Gov. Steve Chiongbian Solon.
