Nangandam na ang probinsiya saDavao Oriental sa posibleng hatod sa bagyong Kabayan nga posibleng mag landfall sa mga coastal municipalities sa nasangpit nga probinsya.
Subay sa gipagula nga Memorandum Order no. 10 nga gi-issue ni Governor Niño Sotero L. Uy, Jr. kagahapon sa hapon, gi-activate na ang Blue Alert Status sa probinsya isip pagngandam sa Tropical Depression “Kabayan”.
Sa Tropical Cyclone Bulletin No.5 nga gi-issue sa DOST-PAGASA kagahapon sa alas-5:00 sa hapon, nabutang sa Tropical Cyclone Wind Signal No.1 ang lima ka munisipyo sa Cateel, Boston, Baganga, Manay, ug Caraga.
Samtang ang mata sa bagyo gibana-banaang anaa sa 315 km East Southeast of Hinatuan, Surigao del Sur ug anaay gikusgon sa hangin nga 55 kph ug paghaguros nga muabot sa 70 kph.
Gisuspendi usab sa Provincial Disaster Risk Reduction and Management Office (PDRRMO) ang mga klase gikan sa kindergarten hangtod Grade 12 sa mga nasangpit nga mga munisipyo nga nailalom sa Tropical Cyclone Wind Signal No.1.
Gi-awhag ni Governor Niño Uy ang tanang mga residente sa probinsya nga mahimong kalmado, mangandam, alerto, ug musunod sa rekomendasyon sa mga awtoridad. Gi-awhag usab ang tanan nga mag-monitor sa mga latest update mahitungod sa Tropical Depression.
Sa pikas bahin, gipaalerto na usab sa mga Barangay Disaster Risk Reduction and Management Council (BDRRMCs) sa dakbayan sa Davao lakip na ang mga volunteer groups ug i-monitor ang coastal areas, kini gumikan gihapon sa posibleng hatod sa bagyong Kabayan.
Sa gipagula nga advisory sa Davao City Disaster Risk Reduction and Management Office, makasinati og pag-ulan ang tag-as nga lugar sa syudad, ug gumikan niini, gipaigmat ang publiko og pabiling vigilante sa palibot.
Dugang pa nga kung kinahanglan ang pre-emptive evacuation, gilayon kining ipatuman.
