Wala nay kinabuhi nga nagbuy-od ang usa ka lalaki dihang naabtan sa mga otoridad alas 11:00 kagabii, Lunes, Abril 29, 2024 sa Sta.Lucia Property Brgy. Poblacion Oriental Consolacion, Cebu.
Ang biktima giila nga si Kyle Florida, hingkud ang pangidaron ug molupyo sa Pulpogan, Consolacion Cebu.
Sa inisyal nga imbestigasyon sa Consolacion Municipal Police Station, nasayran nga nag-inusarang naglakaw ang biktima dihang kalit lang siya nga gipusil sa wala pa mailhing suspek.
Dali pa siya nga gidala sa Eversley Child Sanitarium Hospital Mandaue City, Cebu apan gideklarar kining dead-on-arrival sa attending physician.
Sa pagkakaron, padayon pa ang follow-up operation sa kapulisan aron masuta ang mamumuno engon man ang pagdakop niini. | Alan Tangcawan
