Patay ang isa ka lalaki sa nagluntad nga aksidente sa National highway sang Barangay Tanza Norte, Panay, Capiz takna alas 12:30 kaina sang kaaganhon, Abril 11.
Ginkilala ang napatay kay Rodulfo Oliveros Jr, 33-anyos kag residente sang Brgy. Esperanza, Pontevedra.
Sandig sa inisyal nga imbestigasyon sang Panay Municipal Police Station, nagikan sa Roxas City ang biktima sakay sa iya ginamaneho nga tricycle kag pauli na kuntani sa ila puluy-an, apang pag-abot sa lugar kun sa diin natabo ang aksidente, hinali nalang ini nadulaan sang kontrol sa pagmaneho kag bumaliskad sa karsada.
Bangud sa natabo, nag-igo ang ulo sang biktima sa poste sang kuryente nga nahamtang sa lugar.
Gindala sang Panay Emergency Response Team ang biktima sa isa ka pribado nga ospital sa Roxas City apang ini ang gindeklara sang doktor nga dead on arrival. | Judy Ann Juare