Binawian ng buhay ang isang 41-anyos na lalaki matapos na malunod sa dagat habang naliligo kasama ang kanyang mga kaibigan sa Brgy. Bagong Silang, Calatagan, Batangas
Kinilala ng Calatagan Municipal Police Station ang biktima na si Jessie Julio na residente ng Purok 1, Brgy. Tubigan, Biñan, Laguna.
Sa inisyal na imbestigasyon ng mga awtoridad, bandang alas 12:30 ng hatinggabi kahapon habang naliligo sa dagat ang magkakaibigan ay bigla na lamang nawala ang biktima.
Agad itong hinanap ng kanyang mga kasamahan hanggang sa natagpuan itong nakalutang at wala nang malay, 20 metro ang layo mula sa baybayin.
Dahil dito, mabilis na isinugod sa ospital ang biktima ngunit idineklarang dead on arrival ng doktor.
Isinailalim na sa otopsiya ang katawan ng biktima.
