Ginreklamo sang isa ka Ginang ang lalaki nga nagbakal sang ila salakyan nga mini van matapos nagpalayo kag wala nakabayad sang bulanan nga balayran.
Ginkilala ang biktima kay Clive Diaz, 33-anyos, residente sang Brgy. Sibaguan, Roxas City.
Samtang ang ginareklamo amo si Rene Endencio, yara sa legal ang pang-edaron kag residente sang Jaro, Iloilo City.
Sandig sa ginpabalhag sang biktima sa Roxas Component City Police Station, natabo ang insidente sang Hulyo 2023 kun sa diin si Endencio ang nagbakal sa ila sang mini van nga may plate number nga JAO7346 kag nagabalor sang P70,000.
Ginpahayag sini nga nagpromisa si Endencio nga magbayad sang monthly amortization nga P14,000, apang pag-abot sang Oktubre 2023, nagpamahog na ini nga indi magbayad kag dal-on sa Iloilo ang salakyan agud indi na mabalik.
Suno kay Diaz, nagpangabay sila kay Endencio nga ibalik nalang ang salakyan kun indi siya magbayad.
Makaligad ang pila kabulan, indi na nila makontak ang lalaki bangud ginblock sila sa messenger kag indi naman matawagan.
Bangud sini, ginpakamaayo nalang ni Diaz nga ipa-record sa kapulisan ang natabo kag nagapawagan nga kun sin-o man ang nakakita kag nakakilala kay Endencio ang magpahibalo lang sa otoridad agud mapanabat. | Judy Ann Juare
