Wala na sang kabuhi sang masapwan ang isa ka lalaki nga ginaalegar nalumos sa suba sa Brgy. Calapawan, Panay, Capiz takna alas 5:40 kaina sang aga, Mayo 13.
Ginkilala ang biktima kay Federico Gililang, 53-anyos, residente man sang nasambit nga lugar. Sandig sa imbestigasyon sang Panay Municipal Police Station, takna alas 3:30 kaina sang kaaganhon nakita pa ni Michael Bordones ang biktima nga nagatindog sa higad sang suba kag may ginapangita. Pag-abot alas 5:00 sang aga magapauli na kuntani si Bordones apang may nakit-an ini nga nagalutaw sa suba, sa iya pagtsekyar, nagakulob na sa tubig ang biktima kag wala na sang kabuhi.
Nagapati naman ang pamilya nga posible gin-atake sang balatian nga asthma ang biktima rason nga nalumos. Sa karon, yara na ang bangkay sini sa isa ka punerarya sa nasambit nga banwa. | Judy Ann Juare
