Arestado sang mga otoridad ang isa ka lalaki nga nagasukbit sang armas-luthang sa sulod sang binaylihan sa Brgy. Malunoy, Dumarao, Capiz takna alas 8:30 kagab-i sang Sabado, Nobyembre 25.
Ginkilala ang nadakpan kay alyas Joenel, 31-anyos, mamumugon kag residente man sang nasambit nga lugar.
Sandig sang impormasyon nga nakuha sang Brigada News FM Roxas City sa Dumarao Municipal Police Station, magasulod kuntani sa binaylihan ang suspek apang sang ini ang ginrikisa sang isa ka Anti-Crime Organization nga nahamtang sa lugar, nakita sa iya paghinakop ang isa ka unit sang Homemade Shotgun pistolized kag loaded sang isa ka bala.
Gilayon naman nga ginturn-over sang nasambit nga organisasyon sa mga kapulisan ang suspek.
Magapangatubang ini sang kaso nga paglapas sa RA 10591 ukon “Comprehensive Firearms and Ammunition Regulation Act” and COMELEC Resolution No. 10918 (COMELEC Gun Ban).
Sa karon, nagapabilin ini sa kustodiya sang Dumarao PNP para sa nagakaigo nga disposisyon. | Judy Ann Juare
