Pilason ang isa ka jail officer matapos aksidente nga bumunggo ang iya ginamaneho nga motorsiklo sa kasugata nga salakyan sa Brgy. Tinaytayan, Dumarao, Capiz takna alas 3:30 kahapon sang Sabado, Nobyembre 25.
Ginkilala ang biktima kay alyas Ron, 31-anyos, residente sang Brgy. Poblacion Takas, Cuartero samtang ang driver sang salakyan nga Toyota Vios amo si alyas Cheryl, 44-anyos, empleyado sang Dumarao LGU.
Sandig sang impormasyon nga nakuha sang Brigada News FM Roxas City sa Dumarao Municipal Police Station, samtang ginamaneho ni alyas Cheryl ang iya salakyan sa national hihgway sang Brgy. Tinaytayan hinali nalang ini nagliko pa wala kun sa diin nagapadulong naman si alyas Ron sakay sa iya motorsiklo.
Bangud sa natabo, bumunggo si alyas Ron sa salakyan rason nga ini ang nadulaan sang kontrol kag natumba sa karsada.
Nag-angkon sang minor injury ang jail officer.
Sa karon, nag-settle na ang magtimbang nga bahin kag indi na magpasaka sang kaso ang biktima. | Judy Ann Juare
