Kasong murder ang atubangon sa suspek nga migulgol-patay sa usaka laborer kagahapon sa kadlawon sa Campo 3, Brgy Talomo River Calinan District, ning dakbayan sa Davao.
Naila ang biktima nga si alyas Michael, ulitawo, 39 anyos ug residente sa Purok 1, Brgy Biao Joaquin Calinan District, samtang ang suspek nailang si Alyas Joselito, ulitawo, 23 anyos, trabahante sa mini-supermarket ug residente sa Brgy. Lacson, Calinan.
Sa inisyal nga imbestigasyon sa otoridad, nag-inum ang biktima ug suspek, hangtod nga nagkalalis ang duha human nga giinsulto sa biktima ang relihiyon sa suspek.
Gumikan niini, kalit na lamang nga gitigbas sa suspek ang biktima pinaagi sa paggulgol sa liog niini gamit ang lagaraw.
Patay diha-diha dayon ang biktima ug gidala sa Freedom Life Funeral nga nahimutang sa Ramon Magsaysay Calinan Davao City.
Samtang ang suspek, anaa na gikustodiya sa Calinan Police Station.
