BICOL – PIGKAKARKOLONG maabot sa labi singko mil na mga kwalipikadong benepisyaryo sa Southern Tagalog asin Bicol an natabangan sa saindang mga pangangaipong medikal sa irarom kan programa kan PCSO.
Sa paagi kan saindang Medical Access Program (MAP), pigkakarkolong nasa sa 43.7 million pesos na kantidad nin tabang an naipanao kan PCSO kaining bulan nin Oktubre.
Base sa latest bulletin kan ahensya, pigkakarkolong maabot sa 15,754 an bilang kan mga dugang na Pilipino sa nacion an nagresibe nin asistensya para sa hospital confinement, post-transplant medicines, chemotherapy asin dialysis.
Asin kan bulan nin Oktubre nakapagpaluwas nin maabot sa 190, 560,748 na kantidad nin tabang an PCSO na naipanao man sa 21,593 na mga benepisyaryo sa man iba ibang parte kan nacion .
Ikaduwa sa igwang pinakadakulang alokasyon nin pondo an Southern Tagalog asin Bicol, suminunod sa Northern asin Central Luzon na igwang 52.1 million pesos para sa labi 5,400 na mga tios na benepisyaryo.
Mantang nasa haros 33.5M na medical help para 2,833 indigents gikan sa NCR mantang parehong igwang labi 30 million pesos na pondong ibinaba para sa Visayas asin Mindanao.
An MAP na mas bisto kaito bilang Individual Medical Assistance Program (IMAP) kan PCSO an dinisensyo tanganing tumabang sa mga namamanwaan na igwang problemang pansalud , ini man an naka confine sa ospital, nagsasairarom sa pagpabulong siring kan therapy o anuman na klase nin outpatient healthcare management asin dawa pa an mga pasyenteng kinakaipuhan na magpabolong o magpa opera sa ibang nacion.
