LEGAZPI CITY – Uminabot sa 150 na mga residente kan Daraga an nabenipisyaran kan pigkondusir na surgical mission na pinanganeton kan National Grid Corporation of the Philippines (NGCP).
Isinagibo ini sa Anislag Infirmary kun sain parte ini sa corporate social responsibility kan naunambitang ahensya.
Katabang kan ahensya an World Surgical Foundation (WFS) asin lokal na gobyerno ning Daraga nganing makapagtao nin libreng surgical mission sa mga nangangaipuhan arog kan cyst, warts asin iba pang kondisyon na kaipuhan nin minor operations.
Mientrastanto, nagpasalamat si Municipal Health Officer Dra. Edna Freya Tan, sa lakdang na ini kan NGCP nin huli ta dakulaon na tabang ini sa mga residentes nganing dai na maggastos nin dakulang kantidad nin kwarta.
