MASALIGON si Geraldine Zamora, head sa Business Permits and Licensing Division sa LGU-GenSan nga makab-ot ang target nga ihap sa mag-renew og business permit ning tuiga.
Sa pagtuo ni Zamora, sama sa nahitabo miaging tuig luyo sa pandemya nakab-ot gihapon ang target sa renewal sa business permit.
Gitino usab niini nga karon, online na ang pagproseso ug sukad gisugdan ang trial sa bag-ong proseso milabayng bulan, anaa sa sobra 300 ang naka-renew online.
Gibutyag usab nga daghan na ang naka-aplay sa renewal sa business permit apan naghulat pa og salapi nga ikabayad.
Giawhag usab niini kadtong wala pa nahibalo sa bag-ong proseso pinaagi sa online nga andam nilang tudloan ug moadto lang sa Oval covered court aron ma-asistiran.
Sa Enero 20 gihapon ang deadline sa renewal sa business permit ug gituohan ni Zamora nga wala nay mahitabong extension subay na usab sa milabayng mga katuigan nga walay lugway sa renewal sa business permit.
Ang dili maka-apas sa deadline, maka-aplay gihapon og business permit apan may surcharge na ug penalties nga bayran.
