Gihagit sa Environmental group Interfacing Development Interventions for Sustainability (IDIS) ang lokal nga kagamhanan sa Banaybanay sa Davao Oriental ug ubang hingtungdang ahensya sa gobyerno nga seryosohon ang paghatag og tukmang lakang kalabot sa dili maayong epekto sa large-scale mining operations nunot sa “siltation ug discoloration” sa Mapagba River sa Barangay Maputi sa miaginbg Enero 14, 2022.
Bisan pa man uyon sa temporary suspension nga gipahamtang batok mining operation sa Riverbend Consolidated Mining Corporation, apan nagduda si IDIS executive director Atty. Mark Peñalver, nga posibleng mahitabo pagbalik ang maong insedente.
Gikabalaka sa IDIS ang dakong epekto sa kinabuhi sa katawhan ug kinahiyan ang mining operation sa maong lugar nga matud pa unang gibabagan sa komunidad.
Una niini, niadtong Enero 17 giisyuhan sa Department of Environment and Natural Resources Region-11 og Cease and Desist Order (CDO), Notice of Violation (NOV) ug show cause ang Riverbend Consolidated Mining Corporation ug Arc Nickel Resources, Inc. (ANRI).
Samtang gibutyag ni DENR Davao Region chief Bagani Fidel Evasco, gitun-an sa legal team sa ahensya ang himoong dugang aksyon sa kalapasan sa maong mga kumpanya ug gipaniguro nga ipatuman ang environmental laws batok masinupakong mining companies.
