ALAYUN sa direksyon sa pagdumala ni Sarangani Gov. Rogelio “Ruel” D. Pacquiao nga paglambigit sa komunidad sa paglambo sa ekonomiya sa probinsya, ang Provincial Tourism Office nagpahigayon og Community-Based Tourism (CBT) organization assessment ug profiling sa Malapatan kaniadtong July 22.
Si Provincial Tourism Officer April Marjorie P. Rudes, kauban ang mga staff gikan sa municipal tourism office sa Malapatan, miadto sa Purok Jolohano sa Barangay Sapu Masla aron sa pakighimamat sa mga miyembro sa Jolohano women’s association.
Nasentro ang panaghisgot sa potential tourism developments, lakip na sa pipila ka skills training nga mahimong ipaila sa komunidad.
Gipasabot usab ni Rudes nga ang tumong sa CBT mao ang posibleng pagtumbok sa mga komunidad sa Sarangani Province nga mahimong i-develop isip tourism sites ug panginabuhian.
Sa higayong maestablisar ang CBTs ang motabang sa pagsiguro nga ang local communities ang may full ownership ug pagdumala sa tourism experience aron nga ang benepisyo sa ekonomiya magpabilin sa ilang komunidad.
Ang provincial ug municipal local governments ang muhimo usab sa ilang papel sa paghatag og pondo alang sa mga infrastructure sama sa building, tulay ug kadalanan.
Gawas sa Purok Jolohano sa Malapatan, ang Provincial Tourism Office punting usab nga magpahigayon og CBT profiling ug assessment sa Barangays New La Union ug Tuanadatu sa Maitum; Sitios Falel ug Tamlob sa Kiamba; Barangay Datal Basak sa Maasim; Barangay Pait sa Alabel; Barangays Small Margus ug Datal Bukay sa Glan; ug Tagakaulo community sa Malungon.
Ang Ladol Beach sa Barangay Ladol, Alabel, ug Lamlifew School of Living Traditions sa Barangay Datal Tampal, Malungon ang mga unang CBTs sa Sarangani Province.
