GIREKLAMO sa mga residente sa Lot 5 Sogod, Barangay Apopong ang guba nga dalan nga kanunay ginabanlas sa tubig ug adunay pipila ka balay nga natumpag.
Sumala ni Janice Villaruz naputol ang semento nga dalan duol sa iyang balay ug maoy giagian sa tubig hangtod nga nilalom ang yuta ug nahimo nga sama sa kanal ang ilang agianan.
Kung adunay moagi nga mga motorsiklo alsahon usa bag-o makalahos sa pikas dalan.
Maglisod og agi ang mga bata ug tigulang tungod delikado nga mahulog. Samtang si Jellai Agot, nag-inisyatibo nalang og tambak sa bangag gawas sa iyang balay tungod kung mo-ulan nagasulod na ang tubig baha sa iyang balay. Nag-agwanta usab sa guba nga dalan si Hermohenes Payac nga dugay nang nagpuyo sa lugar, gipaabot na nila sa mga opisyal sa barangay ang problema apan hangtod karon wala pa nahimoan og aksyon.
Andam matud pa ang mga residente nga motabang kung sugdan na sa mga opisyal ang pagpasemento sa lugar aron dili sila mag-agwanta sa guba ug lubak nga agianan. Halos mga lumolupyo sa Lot 5, Apopong ang apektado ug nahadlok sila sa sitwasyon tungod kanunay mag-ulan, hangtod kanus-a matud pa sila magpaabot sa paglihok sa taga barangay kung mangaanod na ilang mga balay.
Samtang sa bahin ni Prk. Chairman Leah Diangzon nasayran niini nga aduna nay gihimong lakang si Kapitan Pao Natividad ug padulong na matud pa sa ilang purok ang pag-ayo sa mga guba nga dalan.
Halos matud pa tanang purok sa Barangay Apopong pulos guba ang mga dalan ug gikahibulong sa mga tawo nga hangtod karon wala gihimo nga aksyon ang mg opisyal aron maplastar ug matarong ang mga dalan aron dili na sila mag-agwanta. I Enamie Mogpon
