Nataban sang duwa ka wala makilala nga suspetsado ang kwarta nga koleksyon sang isa ka kolektor matapos gin-hold up sa Brgy. Timpas, Panitan, Capiz takna 1:00 sang hapon sang tinalikdan nga Sabado
Ginkilala ang biktima kay Jhon Philip Beldea, 24-anyos, residente sang Sitio Puntod, Brgy. Dinginan, Roxas City.
Sandig sa imbestigasyon sang Panitan Municipal Police Station, nagikan sa Panitan public market ang biktima kag nagpadulong sa Brgy. Timpas agud mangolekta ukon magapanukot sang pautang.
Apang, pag-abot sa lugar samtang nagamaneho sang iya motorsiklo ang biktima hinali nalang ini gindikitan sa Honda XRM nga motorsiklo sakay ang duwa ka suspetsado nga lunsay nagasuksok sang itom nga panapton kag naka-bonet.
Ginapahayag nga ginbutong sang isa ka suspek ang jacket sang biktima rason nga natumba ini kag gintutukan sang armas-luthang kag nagdeklarar sang hold-up.
Nakuha gid sang mga suspetsado ang mas o menus P40,000 nga balor sang koleksyon, kag isa ka cellphone.
Madasig naman nga nagpalagyo ang mga suspek padulong sa Sigma nga direksyon. Sa karon, padayon pa ang imbestigasyon kag pagpatigayon sang hot pursuit operation sang Panitan PNP sa nasambit nga insidente. | Judy Ann Juare
