SUBLING nanawagan ang kapulisan sa lokal nga panggamhanan nga hugot ipatuman ang ordinansa kalabut sa CCTV GenSan.
Sama sa pag-require sa tanang establisimento sa siyudad sa pagbutang og Closed-Circuit Television (CCTV). Luyo sa pagkaangkon og ordinansa, daghan ang dili makapataod og CCTV partikular ang gagmay’ng negosyo tungod sa kamahal. Giangkon sa labaw sa Business Permit and Licensing Division (BPLDO) nga daghang establisimento sa gensan wala pa’y CCTV.
Tungod sa kamahal sa pagpa-install ug kakulangon og electronic engineer nga motaod sa mga establisimento, butyag ni Geraldine Zamora labaw sa BPLDO. Solusyon ni Zamora, mo-hire ang LGU og electronic engineers aron hingpit mapatuman ang ordinance no.30 series of 2021 nga nag-require sa mga establisimento sa gensan nga makaangkon og CCTV.
Sa bahin ni Lito Antuya, negosyante, bisan paman mahal ang pagpataod og CCTV alang kaniya responsibilidad niya ang pagkaangkon niini. Una nang, nanawagan Police Lt. Clarizel Perez, labaw sa Women’s and Children Protection Desk (WCPD) sa General Santos City Police Office (GSCPO) sa LGU ipatuman ang ordinansa kalabut sa CCTV.
Ilawom sa ordinansa, usa sa rekisitos sa pagkuha og business permit mao ang pagkaangkon og CCTV. Una nang, gikonsidera sa otoridad ang video footage isip vital sa pagresolba sa krimen. I Richel Gubalani
