MIAPELA ang kapulisan sa Sultan Kudarat ngadto sa mga bus companies nga sundon ang gitakda nga pagpatuman sa seguridad sa ilang mga bus. Kini ang gibutyag ni Police Col. Christopher Bermudez, director sa Sultan Kudarat Provincial Police Office (SKPPO).
Dungan sa pagpasaka na nila og kaso batok sa siyam ka indibidwal nga sagad miyembro sa Daulah Islamiyah (DI) Bungos faction kalabut sa Isulan bus bombing. Matud ni Bermudez, nakitaan nila og kakulangon sa pagpatuman sa seguridad ang kondoktor sa bus human gipasakay ang pasahero nga wala giinspeksyon ang unod sa bag niini.
Kahibaloan nga Nobyembre 2022, human sa pagpamomba sa unit sa Yellow Bus Line (YBL) sa Tacurong City nga nagbilin og usa patay ang dosena nga samaron. Gipahigayon ang transportation summit sa regional office sa Police Regional Office (PRO-12) sa Barangay Tambler, GenSan.
Asa maong summit, nahisgotan ang mga seguridad nga ipatuman sa mga bus aron malikayan ang subling pagkahitabo sa insidente.
Ang summit ang gipangulohan ni Director Jose Briones, Jr., Chairman, Office of Transportation Security, Department of Transportation (DOTr), kapulisan ug mga representante sa bus companies. I Richel Gubalani
