Ginkakibot ni Kapitan Roberto “Maaw” Roldan, Presidente sang Meat Section nga may yara naman sang nadakpan nga hot meat nga ginpasulod sa Teodoro Arcenas Trade Center.
Ini ang iya ginpahayag sang ma-interview sang Brigada News FM Roxas City.
Suno kay Roldan, indi ini maayo bangud nagapakita lang nga wala nagasunod ang iya mga miyembro sa mga patakaran kag nagapasulod sa gihapon sang mga karne nga wala nakaagi sa slaughter house.
Dugang pa sini, dalahig naman sila sa sini nga problema bangud sala sang isa sala sang tanan.
Ginpahayag man ni Roldan nga magapatawag siya sang meeting sa iya mga miyembro agud hinalaan ang kasubong sini nga mga problema.
Posible man suno diri nga magapangatubang sang nagakaigo nga penalidad ang tag-iya nga si Noel Cordova bangud ikaduha na ini nga madakpan nga nagapasulod sang hot meat.
Ginpa-blotter naman nila sa kapulisan ang natabo.
Ginpasalamatan man sini ang team ni Efren Diaz, ang Chief security guard sa TATC bangud sa maid-id nila nga pagbantay rason nga nadakpan nila ang pagpalusot sang karne sang baboy nga wala sang tatak kag nagakaigo nga dokumento. Nagpangabay man si Roldan sa iya mga miyembro sa meat section nga indi na pag-ilugon ang kaangay sini nga buluhaton kag nagalaom man ini nga matapna na ang pagpasulod sang karne sa TATC nga wala sang tatak gikan sa slaughter house. | Judy Ann Juare
