Ginpaidalom na sa state of calamity ang probinsya sang Capiz bangud sa lapnagon nga epekto sang African Swine Fever (ASF).
Sa interview sang Brigada News FM Roxas City kay Board Member Jose Fulgencio “Pepe” Del Rosario, ginpahayag sini nga nangin madinalag-on ang pagpasar sang Sangguniang Panlalawigan nga ipaidalom sa state of calamity ang probinsya sang Capiz pinaagi man sa rekomendasyon sang Provincial Risk Reduction and Management Council (PDRRMC).
Dugang pa ni Del Rosario, madamo gid sang mga nagahupot sang baboy ang nagaproblema bangud indi man nila basta-basta mabaligya ukon mapaguwa ang ila mga baboy kay may nagaharang sa kada banwa.
Kun matandaan, sandig sa report sang provincial veterinary office, sa 473 ka mga kabarangayan sa Capiz, naglab-ot na sa 242 ka mga barangay ang apektado sang ASF. Bangud sini, mahimo na nga matandog ang 30% ukon P32,600,000 nga quick respond fund (QRF) sa P108, 871,000 nga calamity fund subong nga tuig, agud mahatagan sang solusyon ang ASF. | Judy Ann Juare
