Liwat nga nakakumpiskar sang dugang nga 62 kilos sang hot meat ang security guard sa meat section sang Teodoro Arcenas Trade Center.
Sa interview sang Brigada News FM kay Efren Diaz, Chief guard sang TATC, ginpahayag sini nga ila nadakpan ang hot meat takna alas 3:00 kaina sang kaaganhon kag ila ini ginpangitaan sang dokumento apang napaslawan ang tag-iya nga si Noel Cordova nga magpresentar.
Dugang pa ni Diaz, nga sang nagligad nga adlaw nakuhaan man si Cordova sang mas o menus 38 kilos nga karne sang baka nga wala man nakaagi sa slaughter house.
Ginsiguro man sini sa mga kunsyumer sa syudad sang Roxas kag sa probinsya sang Capiz nga safe kag dekalidad ang mga karne nga ila mabakal sa sulod sang TATC bangud hugot gid nila nga ginabantayan kag indi nila pagpabay-an nga makalusot ang kaangay sini nga buluhaton. Nagpangabay man ini sa tanan nga stall owners sa meat section nga magkooperar kag indi na pagliwaton ang pagpasulod sang mga karne nga wala nakaagi sa nagakaigo nga proseso. | Judy Ann Juare
